Лаеш районында 14нче Республика ифтары узды

Оештыручылар булып ТР Мөселманнары диния нәзарәте, «Ак Барс Арена» стадионы дирекциясе, «Туган авылым» милли-туристик комплексы һәм «Казан Экспо» халыкара күргәзмә үзәге чыгыш ясады.
Ифтарда катнашучылар өчен бай программа әзерләнгән иде. Намаз һәм ифтар павильоннарына керү юлындагы фойеда «Абыстайлар хәзинәсе» дип аталган төсле сәүдә-күргәзмә экспозициясе җәелде. Республиканың төрле почмакларыннан килгән осталар күн, текстиль, тире, мамык эшләнмәләрен һәм бизәнү әйберләрен тәкъдим иттеләр. Барлык кул эшләре дә милли стильдә башкарылган.

Программаның рәсми өлеше Коръән уку һәм дога кылу, шулай ук Татарстан Мөфтие Камил хәзрәт Сәмигуллинның сәламләве белән ачылды. Кунаклар алдында Дагыстаннан килгән «Нашидуль Ислам» ислам нәшидләрен башкаручылар төркеме чыгыш ясады. Татарстан вәгазьчеләре дә үз чыгышларын тәкъдим иттеләр. Лениногорск районы имам-мөхтәсибе Булат Раупов Рамазанның соңгы ун көнлегендәге Кадер кичәсенең әһәмияте турында сөйләде.

Кичке намазга (ахшам-намазына) Татарстан Рәисе Рөстәм Миңнеханов, ТР Дәүләт Киңәшчесе Минтимер Шәймиев һәм Казан мэры Илсур Метшин килде. Намаз укыганнан соң, мәхәллә халкы өстәлләр әзерләнгән павильонга юл тотты.

Бүгенге чара өчен ифтар залында авыз ачу өчен 1700 өстәл әзерләнгән иде. Мәҗлес менюсына карабодай боткасы, яшелчә һәм җимешләр, хөрмә, чәкчәк, кәнфит һәм печенье керде.

Ифтарны уздыруга 720 волонтер җәлеп ителде, алар кунакларны каршы алдылар һәм намаз уку, авыз ачу урыннарына озатып йөрделәр. 14 яшьтән өлкәнрәк булган ирекле ярдәмчеләр өстәлләр әзерләде, катнашучыларны урыннарына утыртты һәм чара тәмамланганнан соң биналарны җыештыруда катнашты.