ТР Урман хуҗалыгы министры урынбасары Лаеш районында эш визиты белән булды

Лаеш районында Рәис Гомәров җирле урман хуҗалыклары — «Лаеш урманчылыгы» ДКУ һәм «Лаеш лесхозы» ДБУ вәкилләре белән очрашты. Киңәшмә Лаеш шәһәре администрациясе бинасында узды, анда шулай ук район Башкарма комитеты җитәкчесе Рамил Гарифуллин катнашты.

Төп доклад белән җитәкче-урманчы Валерий Изибеков чыгыш ясады. Ул урманчылыкның 2025 елдагы эш нәтиҗәләренә йомгак ясады һәм киләчәккә планнар турында сөйләде.

Валерий Изибеков билгеләп үткәнчә, узган янгын куркынычы булган чорда 19 ут чыгу очрагы теркәлгән, алар оператив рәвештә юк ителгән.

Урман янгыннарына юл куелмаган. Хәзерге вакытта 2026 елның янгын куркынычы һәм урман культуралары сезоннарына әзерлек бара.

Халык арасында аңлату эшләренә аерым игътибар бирелде. Валерий Изибеков кешеләрне кар эреп бетү белән урманга якын участокларны коры үләннән чистартырга яки урманны янгынга каршы минераллаштырылган полоса белән аерырга чакырды.

Чара ахырында тармакның иң яхшы хезмәткәрләрен бүләкләү тантанасы булды.
Фото: «Лаеш урманчылыгы» ДКУ