Оптимизм, киң күңелелек һәм хезмәт сөю – озын гомерле Татьяна Атаманованың сере

Фото Атамановлар гаилә архивыннан

“Нык, чын, тату” – авылдашлары Татьяна Михайловна Атаманованың зур гаиләсе турында шулай диләр. Шушы көннәрдә аның башлыгына 95 яшь тулды.

Татьяна Атаманова 1928 елда Әлки районында крестьян гаиләсендә туган, анда биш бала тәрбияләнгән. 1938 елда аның әти-әниләре Мамыково авылына күченәләр. Мәктәптә укыганда ул математиканы аеруча ярата. Мавыгучан, актив була, барлык класстан тыш чараларда катнаша. Дәресләрдән соң үзеннән олыраклар белән әти-әнисенә булыша.

-Печән әйләндерергә кирәк – без барабыз. Печән кипкәч – тырмалап җыябыз, - дип искә ала Татьяна Михайловна. – Әти генә эшләде, аның хезмәт хакы зур түгел иде. Әйберләрне әз алдык, әмма без барына шөкер иттек.

1941 елда Бөек Ватан сугышы башлана. Татьяна Михайловна кешеләрнең энтузиазм белән сугышка ыргылуларын искә төшерә, халыкта ватанпәрвәрлек хисе көчле була. Сугыш елларында күп балалы гаиләгә җиңел булмый. Әмма сынмыйлар, бар кыенлыкларны кичерәләр. 1947 елда Татьяна Ульяновский дәүләт педагогия институтына укырга керә. Укуын тәмамлагач үз авылында математика укыта. 1954 елда элекке танкист Атаманов Николай Петровичка кияүгә чыга. Иренең белем аласы килә һәм Татьяна аны хуплый. 1958 елда Николай Лубян урман техникумына укырга керә, ә ул Базарлы Матакта эшли. 1973 елда ирен Столбищега эшкә җибәрәләр. Татьяна Михайловнаны Столбище мәктәбенә математика укытучысы итеп эшкә алалар. Ул анда 1973 елдан пенсиягә чыкканчы эшли.

Столбище мәктәбе турында сөйләгәндә үзенең коллегаларын искә ала – мәктәп директоры Кондуков Михаил Петровичны, завуч Семина Вера Александровнаны һәм аның ире – башлангыч хәрби әзерлек укытучысы Владимир Ивановичны, Степанова Зинаида Георгиевнаны һәм башка күпләрне. Укучылар күп була, бер бинага сыймыйлар, шуңа күрә ике бинада укыйлар. Татьяна Михайловна мәктәп линейкаларының ничек үтүләрен, тантаналы төстә пионерга кабул итүләрен, көзли укучылар белән совхозда бәрәңге җыюларын сагынып сөйләде. Дус-тату яшиләр, яхшы киләчәккә өметләнәләр.

Татьяна Михайловна 45 ел гомерен яшь буынны тәрбияләүгә һәм белем бирүгә багышлый. Ул хезмәт ветераны, коммунистик хезмәт ударнигы, бишьеллык ударнигы, ана медале иясе.

Эштә зур бурычлар, укучылар язмышы өчен җаваплылык гаиләне икенче планга күчерми. 32 ел бергә яшәгән ире белән биш бала үстерәләр.

Яраткан әниләре, әбиләре һәм карт әбиләре юбилеена барлык зур һәм тату гаилә җыелган. Лаеш район башлыгы исеменнән юбилярны район Советы аппараты җитәкчесе Азат Нурмөхәммәтов котлады.

Оптимизм, киң күңеллелек һәм хезмәт сөю – Татьяна Михайловна Атаманованың төп сыйфатлары. Ул бәхетле кеше. Аның яраткан эше, яраткан ире була, хәзер ул кайгыртучан балалары һәм оныклары, оныкчыклары янәшәсендә. Ә элекке укучылары үз укытучыларын хөрмәт белән искә алалар.