Лаеш районы башлыгы Илдус Зарипов чираттагы гуманитар сәфәрдән кайтты

Бу юлы йөк составында — генераторлар, төзелеш материаллары һәм инструментлар, ике квадрокоптер, радиостанцияләр, пилотсыз очу аппаратларын ачыклаучы детекторлар бар иде. Штурмчыларга эш һәм саклану өчен кирәкле барлык нәрсәләр: тактик рюкзаклар, катламалы мультитул-инструментлар, портатив аккумуляторлар әзерләнде. Шулай ук сугышчыларга электропитбайк, кросс мотоциклы, квадроцикл өчен резина, КамАЗ һәм җиңел машиналар өчен аккумуляторлар тапшырылды. 

Йөкнең күңел җылысы белән ясалган аерым бер өлеше дә бар. Безнең осталарыбыз сугышчыларга маскировка челтәрләре, җылылык үткәрми торган пончолар һәм өйдә ясалган коры ризыклар да тапшырды. Бу тәнне генә түгел, җанны да җылыта — өйне, көтүче һәм ышанучы кешеләрне хәтерләтә торган әйберләр. 

Бу ярдәм уртак эш нәтиҗәсендә мөмкин булды. Эшкуарлар, волонтерлар, хәйриячеләр, район халкы — һәркем үз өлешен кертте. Процессны Лаеш районының «МХОдагыларга ярдәм» хәйрия фонды координацияли. Сугышчылардан гаризалар нәкъ менә аның аша уза, ярдәм итәргә теләүчеләрне ярдәмгә мохтаҗлар белән нәкъ менә ул бәйли. 

Волонтерларыбызга аерым рәхмәт сүзләре җиткерәсе килә. Алар маскировка челтәрләре үрәләр, коры паеклар өчен яшелчәләр һәм ит киптерәләр, гуманитар ярдәм җыялар һәм йөкләрне төрәләр. Бу өлкәннәр генә түгел — аларга мәктәп укучылары, студентлар, пенсионерлар да кушыла. Һәркем үз өлешен кертә. Һәм алар бергә һәр посылка белән фронтка китә торган шул җылылыкны тудыралар. 

— Егетләргә безнең янәшәдә булуыбызны тою мөһим. Безнең хәтерләвебезне, көтүебезне һәм ышануыбызны белү кирәк. Аның өчен без барысын да эшлибез: өйдә аларны яраталар һәм һәрвакыт хуплаячаклар. Бу эштә катнашкан һәркемгә — эшкуарларга, волонтерларга, хәйриячеләргә, халкыбызга рәхмәт. Сезгә олы рәхмәтемне белдерәм, — дип ассызыклады Илдус Фатыйх улы. 

Гуманитар эш дәвам итә. Чираттагы йөк инде формалаша. Һәр сугышчы нәкъ менә үзенә кирәкле нәрсәне алсын өчен ярдәм гаризалар буенча бара.