Лаеш техник-икътисад техникумы базасында узган зональ семинарда аграр һөнәрләрнең абруен күтәрү темасы үзәккә алынды. Чарада Татарстанның 6 муниципаль районыннан һәм Казан дәүләт аграр университетыннан 120 студент катнашты.
Семинарда катнашучыларны сәламләп, ТР Премьер-министры урынбасары — авыл хуҗалыгы һәм азык-төлек министры Марат Җәббаров студентлар белән турыдан-туры аралашуның һәм тармактагы заманча мөмкинлекләрне аңлатуның мөһимлеген ассызыклады. Бүгенге көндә республикада зур белем бирү базасы булдырылган: ел саен 2,8 мең яшь белгеч укуын тәмамлый, шулай ук 23 район колледжында әзерлек алып барыла. Бу яшь кадрларны әзерләү эшенә милли проект кысаларындагы «АПКда кадрлар» («Кадры в АПК») федераль проекты зур ярдәм күрсәтә.
Студентларга һәм яшь белгечләргә дәүләт ярдәме:
- Арттырылган стипендияләр: Югары уку йортлары студентлары өчен айлык исемле стипендия — 5 мең сумга, ә урта һөнәри белем алучыларныкы 3 мең сумга җиткерелде. Шулай ук практика чорында 3–5 курс студентларына да 3 мең сум түләнә.
- Бердәм акчалата түләү: Республика Рәисе ярдәме белән эшкә урнашкан яшь белгечләргә 750 мең сум күләмендә бер тапкыр бирелә торган ярдәм каралган (2025 елда бу мөмкинлектән 98 кеше файдаланган).
- Торак программалары: Авыл җирлегендә калучылар өчен махсус ташламалы авыл ипотекасы, социаль түләүләр һәм алга таба сатып алу хокукы белән торакны арендага бирү программалары эшли.
Яшьләр өчен бүген заманча предприятиеләрдә практик белем алу, максатчан уку һәм эшкә урнашканда дәүләт ташламаларыннан файдалану кебек барлык шартлар да ачык, дип йомгаклады министр.
Нет комментариев