”Безнең ишегалды” – ул һәркөнне кешеләрнең кәефе

Исегезгә төшерәбез, ул 2020 елда Рөстәм Миңнеханов инициативасы буенча старт алды.

Әле 2019 елда ук республика шәһәрләрендә һәм авылларында ишегалларын төзекләндерү эшләре кагылачак күпквартирлы йортларда яшәүчеләр белән очрашулар узды.

Рөстәм Нургалиевич билгеләп үткәнчә, бу амбициоз бурыч: биш ел эчендә зур күләмле эш башкарырга кирәк. Күпквартирлы йортларның ишегалларын төзекләндерү проектларын эшләүдә аларда яшәүчеләр актив катнаштылар.

«Кама ягы» “Безнең ишегалды” проекты турында фикер алышуның ничек баруы, ишегалдында уңайлы һәм имин булсын өчен халыкның нинди тәкъдимнәр кертүе турында бер тапкыр гына язмады.

2020 елда «Безнең ишегалды» программасы буенча районның алты авыл җирлеге территориясендә тугыз ишегалдында эшләр башкарылды. Ишегалды территорияләрен, тротуарларны, парковкаларны, урам утларын, балалар һәм спорт мәйданчыкларын төзү буенча эшләр үткәрелде.

Проектка инде «яшь булмаган» йортлар керде. Анда, кагыйдә буларак, төрле яшьтәге кешеләр яши. Барлык буын мәнфәгатьләрен дә исәпкә алырга кирәк иде – нәниләрдән алып әби-бабайларга кадәр. Шуңа күрә фикер алышу, кагыйдә буларак, күп катлы йортларда яшәүчеләрнең күпчелеге катнашында барды, алар үзләренең булачак ишегаллары проектын булдыру буенча эшкә актив кушылдылар. Төрле тәкъдимнәр булды. Спорт мәйданчыклары төзергә һәм территорияне яшелләндерергә, чәчәк түтәлләрен тотып алырга һәм ишегалларын яктыртырга, контейнер мәйданчыклары мәсьәләсен хәл итәргә һәм эскәмияләр урнаштырырга, ишегалдына асфальт салырга, парковка өчен урын җайларга тәкъдим иттеләр.

Мәсәлән, Габишевода 2020 елда 8 йорт янында ишегаллары төзекләндерелде: Идел буе урамында 38, 39, 41 һәм Октябрь урамында 1, 2, 3, 4, 5 йортлар янында. Быел Совет урамы 1, 1а йортлар янында 1 ишегалды. Зур эш башкарылды. Йортларда яшәүчеләр барлык вакытлыча уңайсызлыкларны шатланып каршы алдылар: чөнки алар төзелеш техникасы тавышыннан соң ишегалларының үзгәрәчәген һәм күпкә матуррак булачагын белделәр. Шулай булды да. Хәзер биредә асфальт җәелгән, тротуарлар, яктырту, балалар мәйданчыклары һәм каты көнкүреш калдыклары мәйданчыклары барлыкка килде.

Рөстәм Миңнеханов, ТР Төзелеш Министрлыгының йомгаклау коллегиясендә чыгыш ясаганда, «Безнең ишегалды» программасы – ул һәркөнне кешеләрнең кәефе, дип ассызыклады. Ул бу юнәлештә эш алга таба да дәвам итәчәк, дип ышандырды.

2021 елда әлеге программа буенча Лаеш районында алты торак пунктта – Лаеш шәһәрендә, Урта Девятово, Габишево, Комлы Ковали, Орел һәм Дятлово авылларында 9 ишегалды төзекләндерү планлаштырыла.