Ничек тәкә сатып алырга һәм авырмаска

Хайванны каян алып килүләре шактый мөһим фактор.

Корбан бәйрәме - мөселманнар өчен иң мөһим бәйрәмнәрнең берсе. Быел ул 20 июльдә билгеләп үтеләчәк. Тантананың мөһим элементы - корбан чалу. Ел саен Корбан бәйрәме алдыннан республикага башка төбәкләрдән мөгезле вак терлек кертелә. Әмма хайванны сатып алганда, шуны истә тотарга кирәк: Россия территориясендә хайваннарның кайбер йогышлы авырулары буенча катлаулы эпизоотик хәл күзәтелә.

Мәсәлән, Россия Федерациясенең 33 субъекты мөгезле вак терлекләр тилчәсе буенча имин түгел. Мөгезле вак терлек бруцеллезы буенча - 31 төбәк.

Шуны исәпкә алып, Татарстаннан читтән терлек сатып алганда, республикага хайваннарны кертү буенча түбәндәге таләпләрне үтәргә кирәк:

- читтән терлек кертеләчәк төбәк хайваннарның йогышлы авырулары буенча имин булырга тиеш;

- кертү Баш ветеринария идарәсе белән килештерелергә тиеш, моның өчен терлек кертү нияте турында алдан ук сорату җибәрелә;

- читтән кертелә торган терлекләрнең һәр партиясенә ветеринар-санитария документы рәсмиләштерелергә тиеш;

- керткәннән соң ветеринария хезмәтенә хәбәр итәргә кирәк;

- терлекләр карантин чаралары үтәргә тиеш.

- Авыруны дәвалауга караганда кисәтү җиңелрәк –  бу билгеле хакыйкать, - ди "Лаеш РДВБ" ДБУ башлыгы Олег Портнов. - Тик еш кына, кызганычка каршы, без аның турында авырып киткәч кенә искә алабыз. Таләпләрне үтәгез, сезнең белән барысы да әйбәт булсын.

Фотоны Рәзинә Фаязова бирде.