Кече Елгадан Рәвилә Вәлиуллинаны укучыларыбыз җирле театрның талантлы режиссеры, сүз остасы буларак белә. Инде ул үзен кул остасы итеп тә күрсәтте, аның кул астыннан матур чигү үрнәкләре дә чыга.
Без Равилә Вәлиуллинаның «Татарстан Республикасының чигелгән картасы» зур Республика проектының бер өлеше булган Лаеш районы картасын чигүен яздык инде.
Татарстан Республикасының 43 районында һәм ике шәһәр округында осталар территориаль һәм мәдәни үзенчәлекләре булган Татарстан картасының үз фрагментларын төзеделәр. Милли мәдәниятләр һәм традицияләр елында уздырылган бу масштаблы проектның максаты — Татарстан Республикасының күпмилләтле халкының бердәмлеген ныгыту.
Болгарда 23 июльдә «Яңарыш: заманча укылышта эпос» фестивале кысаларында ТРның чигелгән картасын тәкъдим итү тантанасы һәм муниципаль районнарның традицион чигелгән сөлгеләре күргәзмәсе узды.
Карта чигүче барлык осталарга мәдәният министры рәхмәт хатлары тапшырды. Алар арасында Кече Елга авылыннан Равилә Вәлиуллина да бар иде.
Равилә Баһаутдиновнаны проектның уңышлы тәмамлануы белән котлыйбыз!
Нет комментариев