Командада эшләү һәм беренче белемнәрне тикшерү

Мәктәпнең беренче көне танышуга һәм командада эшләүгә багышланды. Команда ясау буенча тренинглар балаларга тиз арада уртак тел табарга ярдәм итте. Бирелгән белемнәрне беренче тикшерү булып «Татарстанның АПКсы» квиз-уены торды. Катнашучылар республиканың авыл хуҗалыгы, аның предприятиеләре һәм казанышлары турындагы сорауларга җавап бирделәр.

Квиз балаларның мәктәпкә нинди белемнәр белән килүен күрсәтте һәм алдагы көннәр өчен яхшы старт булды. Алга таба аларны тармак белән якыннан танышу көтә иде. Көн ахырында катнашучылар рефлексия ясап, нәтиҗәләр җыйдылар: үз тәэсирләре белән уртаклаштылар һәм мәктәптән нәрсәләр көтүләре турында сөйләделәр.

Министр белән очрашу һәм гамәли сәяхәтләр

Шулай ук катнашучылар ата-аналар белән аралашу буенча тренинг-интенсив уздылар һәм «Кеше булу җиңелме?» программасы белән таныштылар. Моннан тыш, алар авыл хуҗалыгы продукциясен эшкәртү, агро- һәм биотехнологияләр, терлекчелек һәм ветеринария, үсемлекчелектә санлы технологияләр турында белделәр.

Балалар КДАУга, Казан сөт комбинатына, «Чистополье» холдингына һәм «Биосфера-Фиш» комплексына барып кайттылар. Кич белән исә Татарстан Республикасы Авыл хуҗалыгы һәм азык-төлек министры Марат Җәббаров белән очрашу булды. Укучылар Татарстан Республикасы Аграр яшьләр берләшмәсе эшчәнлеге белән таныштылар һәм мәктәпне ачык «Агро-квест» белән тәмамладылар.

Яңа максатларга таба навигатор

«Агролидер»ның төп миссиясе — һәр катнашучы өчен һөнәри сайлау дөньясында навигатор булу. Мәктәп балалар алдында агросәнәгать комплексының әйдәп баручы предприятиеләре ишекләрен ачты һәм аграда белем алуның чиксез мөмкинлекләре турында сөйләде.

Мондый проектлар лидерлык потенциалын ачарга һәм ныгытырга ярдәм итә. Чөнки нәкъ менә шушы балаларга илебезнең киләчәген төзергә туры киләчәк. Булачак агролидерлар өйләренә зур белем багажы, илһам һәм якты тәэсирләр белән кайттылар.