26 августта, Никольский авыл мәдәният йортында «Сугышчан һәм хезмәт батырлыгы даны» дигән патриотик концерт оештырылды.
Бәйрәмнең мәртәбәле кунаклары — Лаеш районы башлыгы урынбасары Татьяна Борһанова һәм Никольское авыл җирлеге башлыгы Александр Пашагин булды. Тантанада хезмәт кешеләренә һәм ил тарихына тирән хөрмәт күрсәтелде.
Мәдәният йорты артистлары тамашачылар өчен күңелгә үтеп керерлек патриотик җырлар һәм бию номерлары әзерләде. Залда бердәмлек һәм җылы гаилә атмосферасы хөкем сөрде.
Концерт кысаларында электрон Мактау тактасына кертү таныклыгы тапшырылды
Тантанада ТР Рәисе Указы белән гамәлгә куелган электрон Мактау тактасы турында искәрттеләр. Быел әлеге югары хөрмәткә Никольский авыл җирлегеннән Лев Толстой исемендәге гимназиянең рус теле һәм әдәбияты укытучысы Светлана Макарова лаек булды. Район башлыгы урынбасары Татьяна Борһанова аңа таныклыкны тантаналы рәвештә тапшырды.
Шулай ук бәйрәмдә «Сугышчы» үзәге курсанты, хәрби госпиталь волонтеры һәм эзләнү экспедицияләрендә катнашучы Аэлита Конахина белән кызыклы әңгәмә узды. Ул яшьләргә кыенлыклардан курыкмыйча, һәрвакыт үз максатларына барырга киңәш итте.
Чара катнашучыларның һәм кунакларның бергә җылы истәлекле фотога төшүе белән тәмамланды. «Сугышчан һәм хезмәт батырлыгы даны» концерты төрле буын кешеләрен берләштерүче һәм Ватан каһарманнарына рәхмәт белдерүче зур вакыйгага әверелде.
Нет комментариев