«Камская новь» («Кама ягы») газетасының элеккеге хезмәткәре Гайшә Габдулла кызы Гайнуллина бүген юбилее белән котлаулар кабул итә.
Бу көзге кояшлы көндә юбилярны котларга Лаеш шәһәре башкарма комитеты җитәкчесе Виктор Арефьев, Сугыш һәм хезмәт ветераннарының шәһәр Советы рәисе Анна Скрипачева, «Лаеш-информ» филиалы җитәкчесе — «Камская новь» («Кама ягы») газетасының баш редакторы Денис Суханов һәм «Студенческий» территориаль җәмәгать үзидарәсе вәкиле Ольга Сурулева килде.
Гайшә Габдулла кызы 1936 елның 10 сентябрендә Лаеш районының Имәнкисә авылында туган. Мәктәпне тәмамлагач, авылда почтальон булып эшли. 1964 елда Лаешка күченеп килә һәм җирле газета редакциясендә хезмәт юлын башлый. Биредә ул 33 ел дәвамында корректор, ә пенсиягә чыккач — текст җыючы булып эшли. Ире Хәбибулла Газиз улы белән бергә ике бала үстереп тәрбияләгәннәр. Гаилә башлыгы 2011 елда вафат була. Бүгенге көндә балалары сөекле әбиләренә өч онык һәм өч оныкчык бүләк иткән.
Юбиляр адресына бик күп җылы сүзләр яңгырады. Гайшә Габдулла кызына ныклы сәламәтлек, озын гомер, якыннарының игътибарын һәм кайгыртучанлыгын теләделәр. Тантанада истәлекле грамоталар, чәчәк бәйләмнәре һәм бүләкләр тапшырылды.
Нет комментариев